شعر بالعامية-طلال حيدر

 

عتمة خياله

 

 

لو كان عندي فرس

 

لضلّ عالعالي

 

بس ندهيني

 

بنزل على خيالي

 

يا بنت راعي الغنم

 

هالموت مقبالي

 

ردّوا معي البواب

 

جايي هوا شمالي

 

في ناس

 

قالوا قتل

 

في ناس

 

قالوا مات

 

في ناس

 

قالوا فتح عتمة خياله

 

وفات

————————

وحدن

 

 

 

 

وحدن بيبقو متل زهر البيلسان وحدهن بيقطفو وراق الزمان

 

بيسكرو الغابي بيضلهن متل الشتي يدقوا على بوابي على بوابي

 

يا زمان يا عشب داشر فوق هالحيطان ضويت ورد الليل عكتابي

 

برج الحمام مسور و عالي هج الحمام بقيت لحالي لحالي

 

يا ناطرين التلج ما عاد بدكن ترجعو صرخ عليهن بالشتي يا ديب بلكي بيسمعو

 

وحدن بيبقو متل هالغيم العتيق وحدهن وجوهن و عتم الطريق

 

عم يقطعوا الغابي و بإيدهن متل الشتي يدقوا البكي و هني على بوابي

 

يا زمان من عمر فيي العشب عالحيطان من قبل ما صار الشجر عالي

 

ضوي قناديل و أنطر صحابي مرقو فلو بقيت عبابي لحالي

 

يا رايحين و التلج ما عاد بدكن ترجعو صرخ عليهن بالشتي يا ديب بلكي بيسمعو

————————————-

بلاد مقوّصة

 

 

نمت

 

فتكروك ولد غفيان

 

قرّبوا منك يحاكوك

 

لقيو بحيرة مي

 

وجّك متل رجعة ولد

 

بعد الغياب

 

وجّك متل تلة

 

وعم تصرخ دياب

 

يا عمر

 

ما بيلحق يجي تيروح

 

وجّك

 

متل بيرق عزا

 

من بعيد عم يلوح

 

انت

 

بيت اهلي

 

ورد عم ارفعو

 

تسيّج الحقلي

 

انت بلاد مقوّصة

 

وعم تنقتل قبلي

 

انت

 

وهبّط يا منام

 

ووعيا متلي

 

واقف على سهل البقاع

 

ملثّم بشمله

 

بصرّخ

 

وصوتي ضايع

 

وقالوا الهوا قبلي

 

يا بيت اهلي

 

يا سطيحات الحمام

 

يا دعس عالي

 

فوق تلجات المنام

——————–

حزن الميدنة

 

أوعا تسمّوها

 

بتحزن ميدنة

 

بيوقع أدان العصر

 

وبينسرق سيف النبي

 

وما بيلتقى بمصر

 

إنت الشام مزيّنة

 

وإنت قواس النصر

 

وقفوا العرب ع سلاحهن

 

لمن فردت الشَعر..

 

تمنيت حالي دهب

 

تاصير متل الشام

 

وتغار مني حلب

 

وما عود فيي نام

 

هـ الموت ع ضهر الفرس

 

مارق بهالإيام

 

والناس

 

ع كتر النعس

 

كل ما مرق بتنام

————————

بتلبقلك الميّ

 

بتلبقلك المي

 

لا تموتي

 

اْغرقي بالمي

 

تيصير موتِك نَعَس

 

وتْصير

 

شمسِك فَيّ

 

وجّك جنازة

 

والملك مقتول

 

والعسكر قبالي

 

في ناس

 

عم بيحوربوا بقصر الملك

 

وفي ناس

 

ع العالي

 

خوفي عليكِ تكبري

 

و خوفي على حالي

 

رح تنزل عليّ الدني

 

و يتغرّق خيالي

 

ون كان

 

لا بد وغنى ورح ترحلوا

 

محّوا الطريق

 

مرسوم ع الحيطان

 

ولد حفيان

 

راكض بالحريق

 

قومي نعسيلُه يا دني

 

بلكي إذا نْعستي

 

بيفيق

 

يللي نطرتُه رجع

 

طلع الصبح صبحين

 

شمّيت ريحة علي

 

قالوا

 

مرق الحسين

 

جيبُه بيارق كربلا

 

وسماع ملّا آه

 

فردوا البيارق بالهوا

 

قال الهوا

 

ألله

 

ألله .. ألله

 

فتحلي درفتين الـ هـَ

 

وخللي الهوا

 

يختم ألف باء الهوى

 

بالـ هـَ

 

وجّك أدان الصبح

 

و الفاتحة اسمِك

 

والـ تا المربوطهْ

 

شريطهْ على رسمِك

 

وبتقول خبّيني؟!

 

بخبيكْ ما بين الحمد و الفاتحة

 

بغطّيكْ بالرحمن

 

من بعد ما بإيدُه

 

رفع للمي

 

بكربلا

 

تيشرب العطشان

 

قلّلا لها الميّ نزلي

 

من سورة الرحمن

 

ليش هيك صرتي كتار

 

وبعدِك ما حدا

 

وحلوه ..

 

مَرّه متل هـ الصيف حفيانِهْ

 

ومرّه متل شي بلاد كسلانِهْ

 

ومَرّه

 

متل غمِّض وقبل ما تفتِّح اْنساني

 

أول ما شفت النهر عمبيطوف

 

عرفت أيَّ منام

 

بدي شوف

—————-

فقير الله

 

 

وحياة روح العشب

 

وحياة روح المي

 

يشهد عليي السجر

 

ولو كان تحته فـــيّ ْ

 

لارسملك الشمس

 

ع صفحة سما زرقا

 

وشفلي فقير

 

يخرتش على طرافا شوي

———————–

ريشة نعام

 

 

حلوة

 

متل طلوا العرب

 

رح يوصلوا ع الشام

 

وجّك قبيلة بيعدت

 

ما وصلا الأسلام

 

وجك متل حقلة قمح

 

نيال يللي نام

 

دقّوا مهابيج البكي

 

وهدول يا طير الحمام

 

بيناتنا

 

قوس القدح منصوب متل خيام

 

ومن فوق قوسك يا دني

 

عم توقع الأيـــام

 

بيناتنا

 

قولة غفي

 

والموت ريش نعام

 

سلّم ع موتك يا هلي

 

بيطلعلنا نودّي سلام

 

خلصْ اللي بيني وبينكن

 

عم شوف متل منام

 

جمال وبدو رح يرحلوا

 

وبحكي

 

وما بيطلع كلام

—————-

 

Advertisements

About منظمة علي النهري في الحزب الشيوعي اللبناني

موقع منظمة علي النهري في الحزب الشيوعي اللبناني
هذا المنشور نشر في فن/أدب/وجهة نظر وكلماته الدلالية . حفظ الرابط الثابت.

اترك رد

Please log in using one of these methods to post your comment:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s